LAOAG CITY – Inrakurak ti Malakanyang nga agingga ita ket saan latta a ma-trace dagiti otoridad no sadinno ti ayan ni dati a Public Works Secretary Manuel Bonoan kagiddan ti pannakapaayna a makasubli ditoy Pilipinas kalpasan a timmalaw a nagturong idiay Estados Unidos.
Nasken a simmangpet ken nagsublin ditoy Pilipinas ni Bonoan idi Disiembre 17 ngem inbatad ti Bureau of Immigration nga awan ti rekord a mangitudo iti panagserrek ni Bonoan ditoy pagilian.
Ni Bonoan ket agdama a subject ti immigration lookout bulletin gapu iti maipagarup a pannakairamanna iti flood control controversy.
Kayatna a saoen, inbilin ti immigration authorities nga imonitor laeng ti biahena ken saan a lappedan a tumalaw ditoy pagilian.
Maysa nga hold departure order ti nangipaay iti government agents ti bileg a lappedan ti maysa a tao nga agbiahe nga agturong iti dadduma a pagilian nga iparuruar ti korte.
Maipalagip a timmalaw ni Bonoan idi Nobiembre 11, 2025 tapno kuyugen ti asawana para iti maysa a medical procedure.
