LAOAG CITY – Inreport ni Bombo International Correspondent Elvie Aviador iti Tel-Aviv, Israel a saanen a mandatory ti panagusar ti face mask iti nasao a pagilyan.
Kuna na a nagsublin ti normal a sitwasyon idiay Israel no sadinno a nawayan ti siasinno man a mapan sumrek kadagiti pasdek negosyo ken amin a pagpasyaran iti nasao a pagilyan.
Inbaga na pay a simreken dagiti estudyante kalpasan a naglukat dagiti pagadalan.
Inlawlawag na a nagdesisyon ti gobierno a saanen nga agusar ti face mask dagiti tattao idiay Israel kalpasan nga umaboten iti 80 a porsiento ti nabakunaan ti Pfizer no sadinno a ti immuna a nabakunaan ket mismo a ni Israeli Primine Minister Benjamin Netanyahu.
Nupay kasta, saan pay laeng nga agpastrek ti Israel kadagiti aggapo iti pagilyan a nangato pay laeng ti kaso na ti covid-19.
Innayon na nga ado dagiti nagpabakuna nga agnaed idiay Israel gapu ta amin a nabakunaan ket maikkan ti passport green nga isu ti ipakita da no sumrek da kadagiti pasdek a pagturungan da ken uray iti pagluganan da a mangitulod iti destinasyon da.
