LAOAG CITY – Naiget ti pannakamonitor ti salun-at dagiti Persons Deprived of Liberty (PDLs) iti Ilocos Norte Provincial Jail no sadinno nga adda ti dua a nurse a nakatutuk kadagitoy.
Daytoy ti pinasingkedan ni Jail Warden Edietor Guiang iti Ilocos Norte Provincial Jail (INPJ), kalpasan nga adda ti pimmusay a balud iti laeng kallabes gapu iti sakit ti puso.
Inpasigurado met ni Guiang nga awan ti problema no maipapan iti agas para kadagiti balud gapu ta no agkiddaw da iti Provincial Health Office ket dagus da met a mangipaay babaen ti panangaprubar ni Governor Cecilia Araneta-Marcos.
Kuna na nga iti agdama ket adda ti 141 a balud iti Ilocos Norte Provincial Jail no sadinno a 17 ditoy ket babbai.
Inbatad ni Guiang nga 60 a porsiento dagiti balud ket sumangsango ti kaso nga illegal a droga.
