LAOAG CITY – Naelektaran manen kas Presidente ti Tanzania ni Samia Suluhu Hassan a nakagun-od ti baro a termino iti panagserbina iti baet kadagiti aldaw ti riribuk iti intero a pagilian.
Basar iti electoral commission, nangabak ni Samia ti 98% a butos nga arig innalana amin a 32 a milyon a balota idi Mierkoles.
Nangipeksa dagiti international observers ti panagdanag iti kinaawan ti transparency ken nalawa a riribuk a naipadamag a nangibati ti ginasgasut a tattao a natay ken ginasgasut a nasugatan.
Mainaig iti daytoy, ti nationwide internet shutdown ket mangparparigat iti panangberipikar ti bilang dagiti pimmusay.
Inkarigatan ti gobierno a kissayan ti kinaadu ti kinaranggas ken inyalud-od dagiti otoridad ti curfew iti gagem a masolbar ti riribuk.
Kabayatanna, pormal nga indeklarar ni Jacobs Mwambegele, electoral chief ti panangabak ni Samia Suluhu Hassan a nangabak iti presidential election iti babaen ti Chama Cha Mapinduzi (CCM) party.
