LAOAG CITY – Nagkedked ti Sandiganbayan ti mosion ni dati a Senador Ramon “Bong” Revilla Jr. nga agkidkiddaw ti panag-inhibit ni Associate Justice Karl Miranda iti kaso a malversation nga inpila kontra kenkuana gapu iti kinaawan ti umdas a pangibasaran.
Iti resolusion nga addaan ti petsa a Pebrero 10, inbatad ti anti-graft court a responsibilidad ni Justice Miranda nga ituloy ti panagdengngeg iti kaso nga adda ti pakainaiganna iti maipagarup a ₱92.8 milyon a ghost flood control project idiay Pandi, Bulacan.
Segun iti korte, ti panag-inhibit nga awan ti nalawag a pammaneknek ti panangpabor wenno personal nga interes ket manglukat iti forum-shopping ken mangdadael iti alisto ken patas a panangipadanon ti hustisia.
Immunan a kiniddaw ti kampo ni Revilla ti panagsanod ni Miranda gapu ta ti kabsat ti mahistrado ket nagbalin nga abugado ni dati a Public Works Undersecretary Roberto Bernardo iti Senate inquiry iti flood control anomalies.
Ni Bernardo ket maysa itan nga state witness kadagiti nasao a kaso.
Inbutaktak ni Miranda a pagayamna ti lead counsel ni Revilla a ni Atty. Ramon Esguerra ngem inpetteng ti Sandiganbayan a dagiti pagannurotan iti inhibition ket nasken nga ipatungpal a naannad iti panagbalin a patas ken addaan ti integridad ti korte.
Gapu iti daytoy, naan-anay nga inbasura ti korte ti mosion ni Revilla gapu iti kinaawan ti merito.
