LAOAG CITY – Inbatad ni Sang Panlalawigan-elect Marlon Sales a sublianan na dagiti lugar a nagkampanyaan na tapno personal nga agyaman kadagiti tattao a nangsuporta ken nagtalek kenkuana a nangitunda ti panagballigi na iti kalepleppas a 2025 Midterm Elections.
Kuna na nga aramiden na daytoy iti umuna a 100 nga aldaw na kas kameng ti junta probinsial.
Inlawlawag na a malaksid iti panagyaman na kadagiti nangsuporta kenkuana iti intero a primero distrito ket kayatna pay nga amwen no ania dagiti kalikagom dagiti umili tapno isu ti idasar na iti junta probinsyal.
Innayon na a saanna a ninamnama ti kaado dagiti umili a nagtalek kenkuana isut gapuna nga aramiden na met amin a kabaelan na tapno masubadan na dagitoy babaen ti panagserbi na a nasayaat.
Inrakurak daytoy ni Sales kalpasan ti pormal a pannakaiproklamar na iti Sang panlalawigan Session Hall babaen ti Commission on Elections.
