LAOAG CITY – Kalikagom ti Sang Panlungsod a mabaliwan dagiti guidelines iti pannakaiwayat ti grand float parade kas paset ti Pamulinawen festival ditoy ciudad ti Laoag.
Basar ken ni Vice Mayor Rey Carlos Fariñas, naobserbaran na a dagiti nangabak kadagiti amin a category ket manipod iti sabali nga ili nga arig na awan ti nagbalin nga entry dagiti residente ditoy ciudad.
Innayon na naobserbaran pay a dagiti nangabak a float ket immunan a nausar iti panagfiesta iti ili da ken nanayonan laeng iti disenyo da iti panangilaban da ditoy ciudad ti Laoag.
Mainaig iti daytoy, inpetteng ni Konsehal Handy Lao, ti chairman ti Committee on Tourism, nga addan ti tallo a tawen nga ilunglungalong na nga adda koma iti maisina a kategorya para kadagiti floats manipod iti sabali nga ili kasta met ti kategorya dagiti float dagiti residente ditoy ciudad, ken kategorya dagiti kompanya ditoy ciudad.
Nupay kasta, kuna na a gapu ta awan ti makaumay a pondo ket kapilitan a ti agdama a guidelines ti nasurot ita a tawen.
Inpanamnama na nga iti sumaruno a tawen ket mabaliwanen dagiti guidelines para iti grand float parade ditoy ciudad ti Laoag.
Maipalagip nga idi Pebrero 9 ket naiwayat ti grand float parade no sadinno a ti nangabak ti small float parade category ket dagiti sumaganad:
1st place – Bgry Nalasin iti ili ti Solsona
2nd place – Brgy Capurictan iti ili ti Solsona
3rd place – Brgy. Mariquet iti ili ti Solsona
Iti met biang iti Big float category:
1st place ti Brgy. Naglicuan iti ili ti Pasuquin
2nd place ti Brgy. Darasdas iti ili ti Solsona ken ti JOMR builders and construction supply
3rd place ti Legasco
