LAOAG CITY – Nagsurat ti Sangguniang Panlalawigan nga idadaulwan ni Vice Governor Matthew Marcos Manotoc iti Department of Public Works and Highways tapno agkiddaw ti listaan dagiti flood control projects ditoy probinsya.
Segun iti bise gobernador, kalikagom da a maamwan ti status ti tunggal proyekto ken no siasinno ti kontraktor dagitoy.
Mainaig iti daytoy, kiniddaw pay ti bise gobernador ti tulong dagiti kongresista tapno al-alisto ti pannakaala da ti listaan.
Innayon na na nga uray dagiti in-house projects ti gobierno probinsyal ket masapol a maimbentaryo.
Kunana a masapol a tumulong ti junta probinsyal a mangkita no ania ti status dagiti proyekto ti gobierno probinsyal gapu ta saan a kabaelan amin ti gobernador a kitaen dagitoy gapu kadagiti narway a trabaho na.
Kabayatanna, inbatadna a suportaran na ti kalikagom ni Presidente Ferdinand Marcos Jr. a maisubli ti pannakipaay kadagiti Local Chief Executives ti karbengan a mangaprobar nga umuna kadagiti proyekto ti Department of Public Works and Highways sakbay a maiyimplementar tapo adda ti check and balance.
Innayon na a saan koma a naikkat daytoy gapu ta kasapulan ti check and balance kadagiti kastoy a banag.
Nupay kasta, inpakaammo ni Manotoc nga awan pay ti naduktalan na no adda dagiti proyekto ditoy probinsia a kinontrata dagiti 15 a government contractor a karaman kadagiti kontrobersyal a flood control projects.
