LAOAG CITY – Inpasa ti Sang. Panlalawigan ti maysa a resolusyon a mangipapaay ti suporta iti indasar ni Sen. Imee Marcos a Senate Bill No. 2629 wenno iti panakaipa-atiddog ti termino dagiti barangay officials ken mapagbalin daytoy nga innem a tawen.
Daytoy ket ti Draft Provincial Resolution No. 2024-07-317 nga indasar ni Hon Ryan John Pascua, chairman ti committee on barangay affairs, no sadinno a gagem na nga insigida maipasa daytoy kas maysa a linteg.
Kuna ni Pascua a daytoy ti addang nga inaramid da gapo ta mariknada a kas maysa a Barangay Official, saan nga umdas ti tallo a tawen a termino da tapno maipasa ken maimplementar a nasayaat dagiti linteg a kalikagumda nga ipasa para iti pagsayaatan iti lugar ken dagiti umili.
Inlawlawag na a ti tallo a tawen a termino da ket makapaspasar da iti panakaitantan dagiti plano da ken marigatan da a mangaramid kadagiti gagem da a kas opisyal ti barangay.
Mainaig iti daytoy, kunana nga amin a barangay ditoy probinsya ket nangipasa iti bukod da a resolusyon a mangsuorta iti nasao a gakat ken mangkidkidaw a maipasa a kas linteg sakbay a maiwayat ti Barangay ken Sang Kabataan ELection inton tawen 2025.
