LAOAG CITY – Inaprubaran ti Sangguniang Panlalawigan (SP) ti Draft Provincial Resolution No. 2021-09-376 a panangselebrar ti maika-104th Birth Anniversary ni dati a Presidente Ferdinand Edralin Marcos intono Septiembre 11, 2021 ken pannakaideklarar ti aldaw ti Biernes, Septiembre 10 kas Special Non-Working Holiday gapu ta ti Septiembre 11 ket nairana iti aldaw ti Sabado kadagiti amin nga opisina dagiti nagduduma a Local Government Units ditoy probinsia.
Segun ken ni Sangguniang Panlalawigan Member ken Chairman ti Committee on Laws Atty. Da Vinci Crisostomo, gapu ta lokal nga aktibidad daytoy ket adda ti bileg ti junta probinsyal nga ideklara ti maysa nga aktibidad nga adda ti pakainaiganna ti pakasaritaan ditoy probinsia maibasar iti Local Autonomy ti Local Government Code.
Inbatadna a daytoy ket no bilang saanto pay a maaprobaran ti inpasada a resolusion iti Office of President nangruna ket sumagmamano laengen nga aldaw sakbay ti panagkasangay ti dati a Presidente ditoy Pilipinas.
Inlawlawagna a rumbeng laeng a maselebraran daytoy a banag iti laksid nga adda dagiti kritiko ken saan a mangayat ken ni dati a Presidente Marcos.
