LAOAG CITY – Nangipasa ti resolusyon ti Sang Panlungsod ditoy ciudad ti Laoag a mangipaay ti suporta iti pannakaipasa ti gakat a mangipaay ti libre a kuryente kadagiti kwalipikado a pilipino iti pagilian.
Ti nasao a resolusyon ket indasar ni Liga ng mga Barangay President Rbee Ablan.
Kunana a nakaipalaon iti resolusyon a suportaran ti konseho ditoy ciudad ti pannakaipasa ti gakat a “free electricity for low consumption households act” nga indasar ni Ilocos Norte 1st District Rep. ken Majority Leader Sandro Marcos.
Segun kenni Ablan, ti kuryente ket maibilang kas maysa kadagiti kangrunaan a pagkasapulan dagiti tattao iti inaldaw.
Innayon na a daytoy ket dakkel pay a makatulong iti komunikasyon, edukasyon ken salun-at dagiti tattao.
Ibilang ni Ablan a napintas a mapagbalin a linteg ti nasao a gakat gapu ta dakkel a tulong daytoy para kadagiti nakukurapay a Pilipino.
Naipalaon iti gakat a ti gobierno national ti direkta nga agbayad ti makonsumo a kuryente dagiti kwalipikado a benepisyaryo iti nasao a programa.
Maipalagip nga iti laeng kallabes ket indasar ni Congressman Marcos ti gakat a nakaipalaonan ti libre a kuryente para kadagiti Pilipino a saan a nalablabes ngem 135kwh ti makunsomo da ken saan a nangatngato ngem 2 a ribo a pisos ti bayadan da iti kada dua a bolan.
