LAOAG CITY – Mangipaay ti konseho iti 100 a ribo a pisos a gunguna para iti pagadalan a pages-eskwelaan dagiti student journalist ditoy ciudad ti Laoag.
Daytoy ket kalpasan a nagun-od ti Schools Division Office ditoy ciudad ti Over all champion iti Elementary Level ken First Runner up iti Over all Result iti naiyuswat a 2025 Regional Schools Press Conference ( RSPC ) idiay ciudad ti Dagupan.
Segun iti chairman ti Committee on Education and Culture, naimatangan na mismo no kasano iti sitwasyon dagiti estudyante a napan nakisalip iti nasao a kompetisyon gapu ta maysa kadagiti nakipartisipar ket anakna.
Kunana a kas ama ket ado pay dagiti kasapulan dagiti estudyante iti pannakipartisipar da iti nagduduma nga aktibidad iti Regional Schools Press Conference.
Inpalgak na a maysa a kangrunaan a kasapulan dagiti maseknan ket ti pinansyal a tulong, taraon ken dadduma pay.
Inpasigurado ti chairman ti nasao a komite nga ad-adda pay a tutukan da daytoy a banag tapno papigsaen ti pakinakem dagiti ubbing ken ad-adda nga ipursige da ti manggun-od iti nangatngato a pwesto.
Ti Regional schools press conference ket maysa a naindaklan nga aktibidad a mangasa kadagiti student journalist iti nagduduma nga aktibidad kas iti feature writing, editorial cartooning, radio broadcasting ken dadduma pay.
