LAOAG CITY – Nangipasa iti konseho ti resolusyon a mangiparangarang ti commitment ti gobierno lokal iti panangipaay ti transparency, accountability ken konsultasyon iti komunidad iti amin nga infrastructure project ti national government ditoy ciudad ti Laoag.
Segun kenni Vice Mayor Rey Carlos Farinas, napateg dagitoy nga addang tapno maliklikan ti korapsyon.
Patien ti bise mayor a tunggal piso ket rumbeng nga usaren ti gobierno iti rebbeng a pakausaran na.
Inrakurak na a nakailanad iti paglintegan a ti gobierno national ket rumbeng a mangisayangkat ti periodic consultation kadwa na ti lokal a gobierno tapno masigurado nga umno ti pannakaimplementar ti nagduduma a proyekto aglalo iti benneg ti imprastraktura.
Inpalgak na a dagiti anomalya kas ti ghost project ket dakkel a makalapped iti panagprogreso ti pagilyan.
Mainaig iti daytoy, kuna ti bise mayor a mangipaay ti konseho ti kopya ti nasao a resolusyon iti opisina ti presidente, Department of Public Works and Highways, Department of Interior and Local Government, gobierno probinsyal, congressional office, City Mayor iti ciudad ti Batac, pakairamanan ti amin a munisipalidad ken Brgy. council ditoy ciudad ti Laoag.
Innayon na a daytoy ket saan laeng a dokumento ngem panawagan a liklikan ti panagkurakot ken aramiden ti umno a serbisyo para kadagiti umili.
