LAOAG CITY – Kalikagum ti Sangguniang Panglungsod ditoy siudad ti Laoag a mapaayaban ti mangidadaulo ti City Disaster Risk Reduction and Management Office tapno agpalawag no apay ita laeng a magatang dagiti heavy equipment.
Segun ken ni Sangguniang Panglungsod Member Atty. Jason Perera, daytoy ket kalpasan a saanda a mapnek ken mamati dagiti dinakamat a rason ti pannakabagi ti Local Finance Committee.
Gapu iti daytoy, inpalgakna a nadismayada nga agpanpanday linteg gapu ta saan nga agsusurot dagiti ibagbaga dagiti maseknan isu a kunana a masapol a mailawlawag daytoy a naimbag iti konseho.
Inlawlawagna a para kenkuana ket saanda nga aprobaran ti 24 milyon a pisos para iti balbaliw a pannakailatang ti nasao a pondo nga igatang kadagiti nagduduama nga heavy equipment kas ti bulldozer, rubber boat, pick-up ken dadduma pay.
Inbatadna a gapu ta saan a naigatang ti nasao a pondo idi tawen 2020 ken 2022 ket ngimminan ti presio dagiti sumagmamano nga heavy equipment a kalikagumda a gatangen kas ti pick-up a P2.1 million idi tawen 2022 ket itan umaboten iti P3.4 million.
Mainaig iti daytoy, basar iti nagbalin a palawag ti Local Finance Committee a dimmatag iti konseho a naipangpangruna a nausar ti pondo para iti pananglaban iti COVID-19 pandemic kas kadagiti Personal Protective Equipment wenno PPE idi kangitingitan ti pandemiya.
Immuna iti daytoy, kwinestionaran pay ni Sangguniang Panlungsod Member RJ Farinas no apay ita laeng a tawen a magatang dagiti nasao nga heavy equipment ditoy siudad ti Laoag.
