LAOAG CITY – Nagpalagip ti Sangguniang Panlalawigan kadagiti amin a Fire Station ti Bureau of Fire Protection ditoy Ilocos Norte iti naiget a pannakaiyimplementar ti Fire Code of the Philippines.
Inaramid daytoy ni Bokal Da Vinci Crisostomo kabayatan ti pannakaiyuswat ti Regular Session ti hunta probinsial pakaseknan iti mapaspasungadan a pannakaselebrar ti Fire Prevention Month iti bulan ti Marso.
Inbatad na a gagem da a masaganaan a naimbag ti possible a pannakauram ti maysa a pagtaengan, pasdek negosio, establishimento ken dadduma pay.
Gapu iti daytoy, inbatad na nga imbitaran da ni Fire Chief Inspector Roxanne Parado, ti Provincial Fire Marshall ditoy probinsia tapno mapagsasaritaan dagiti rumbeng a maaramid no bilang adda ti saan a mapakpakadaan a mapasamak nga uram.
Innayon na a masapol nga adda ti maiyuswat a programa pakaseknan iti daytoy tapno maikkan ti ideya dagiti residente nangruna ket residential areas ti masansan a pakapaspasamakan ti uram.
Maipalagip a ti kangrunaan a rumrummuar a rason dagiti napaspasamak nga uram ket ti electrical fire pakairamanan dagiti mahilig a makikonektar wenno maaw-awagan ti jumper no sadino a ditoy nga ag-overload ken gapu iti kinaadu ti nakasaksak a kable ket kellaat nga agputok a mangitunda iti uram.
Immunan a nagballaag ti BFP a saan nga ipalubos nga ag-overload dagiti circuit, saan a baybay-an dagiti light sources nga unattended kas ti nakasindi a kandila, gasera ken dadduma pay tapno maliklikan iti uram.
