LAOAG CITY – Mangipatulod ti surat ti Sangguniang Panlungsod ditoy siudad ti Laoag iti Department of Public Works and Highways 1st District Engineering Office tapno kitaen ti situasion dagiti water station kadagiti nagduduma a barangay a saan a maus-usaren.
Inbatad ni Vice Mayor Rey Carlos Fariñas a sayang dagitoy a water station no saan a maus-usar a pinundoan ti national government no sadinno a dakkel koma ti maitulongna kadagiti barangay.
Inlawlawagna a dagitoy a water station ket pakairamanan iti Barangay Metro Lapaz, Barangay Caaoacan ken Barangay Cataban.
Mainaig iti daytoy, maragsakan ni Fariñas ti water station iti Barangay 1 ditoy siudad a maus-usar ken mabenbenepisiaran dagiti umili.
Kabayatanna, kuna ni Konsehal Jaybee Baquiran a ti water station iti Barangay Lapaz nga adda iti asideg ti Torre ket maipagarup a pinurwakanda ti natay a pusa iti tangkena.
