LAOAG CITY – Kalikagum ti Sangguniang Panlungsod a mapaalisto ti proseso iti panagawat ti insentibo kadagiti senior citizen.
Daytoy ket kalpasan a naobserbaran dagiti agpanpanday linteg a no agawat dagitoy ket adu dagiti requirements pay laeng a kasapulan nga ipakita sakbay a maawat dagiti insentibo dagitoy.
Basar iti Sangguniang Panlungsod, napintas ti nasao nga addang tapno saanen nga aggastos pay dagiti senior citizen para iti panagpa-photocopy kadagiti requirements a masapolda nga ipasa.
Naammoan nga adda met ti opisina ti Office of the Senior Citizens Affair a mang-validate wenno mang-double check dagiti ipakita a requirements dagiti mapan agawat a kabagian dagitoy tapno maarisit met laeng a naimbag.
Mainaig iti daytoy, imbes nga adu a requirements ti ipakita dagiti senior citizen ket umdas ti Certificate of Residency ken dagiti ID dagitoy ti Office of the Senior Citizens Affair wenno aniaman a government ID.
Kabayatanna, daytoy a gannuat ket tapno saan a marigatan dagiti senior citizen kadagiti requirements ken mapaalisto ti panangawatda kadagiti insentibo dagitoy.
