LAOAG CITY – Nauram ti Sanitary Landfill iti siudad ti Batac.
Daytoy ti kinumpirmaran ni Senior Fire Officer 1 Redento Guillermo, Chief Investigator ti Bureau of Fire Protection iti nasao a siudad.
Segun kenkuana, basar iti insayangkatda nga imbestigasion ket naduktalanda a ti namunganayan ti pannakauram ti Sanitary Landfill ket gapu iti “excessive direct sunlight” kadagiti light materials a basura.
Inbatadna nga apaman a nakaawatda ti tawag maipapan iti daytoy ket dagusda a napan nagresponde kaduada ti City Disaster Risk Reduction and Management Council iti siudad ti Batac.
Inlawlawagna nga iti laksid a bassit laeng ti area iti nakapasamakan ti uram ngem inadmitirna a narigatanda a nangsebseb daytoy gapu ta kaadduan kadagiti basura ket plastic nga isu ti nangitunda ti alisto a panagramram ti apoy.
Kabayatanna, nagpalagip iti publiko a dagusda nga ipakaammo kadagiti otoridad no adda ti makitada nga uram tapno dagus daytoy a masebseban ken maliklikan ti panagdakkel ti apoy.
