LAOAG CITY – Inrakurak ni Sangguniang Panlalawigan Member Dr. Medeldorf Gaoat, Chairman ti Committee on Health and Sanitation a masapol a mangala ti License To Operate dagiti sari-sari store owners tapno makalako dagitoy ti agas.
Segun kenkuana, daytoy ti maysa kadagiti napagnunumoanda kabayatan ti pannakaisayangkat ti Committee Hearing pakaseknan iti panangtalantanda iti pannakaipawil ti panaglako ti agas kadagiti sari-sari stores ditoy probinsia.
Inbatadna a kasapulan dagiti aglaklako iti tiangge ti agaplikar ti license to operate kas Retail Outlet for Non Prescription Drugs wenno ti maaw-awagan nga Over the Counter Drugs gapu ta dagiti parmasiya ti napusgan ken naikkan ti bileg nga aglako ti Antibiotics and Prescription Drugs.
Kunana a masapol a mapaigetan ti panaglako ti agas kadagiti tiangge rason a napagsasaritaanda a kasapulan ti Registered Pharmacist a mangmonitor kadagiti sari-sari stores nangruna ket saanda a mabalin nga aglako dagitoy ti prescription drugs ken antibiotics.
Inlawlawagna a maysa a Registered Pharmacist ti mabalin a ma-hired para kadagiti 15 a sari-sari stores nga adda ti kaadayoda iti 25 a kilometro iti tunggal puesto dagitoy.
Nupay kasta, inbagana a saanda pay a masinunuo no kasano ti panangbingayda ti oras a panagbantay ti maala a Registered Pharmacist gapu ta saan met a maibaga no ana nga oras a mapan gumatang dagiti residente ti agas kadagiti tiangge.
Inpalgakna a saan pay a mabalin nga ilako ti mefenamic iti over the counter drug gapu ta makairisgo daytoy iti salun-at dagiti agtumar no mapalaloanda dagitoy.
Inpakaammona a nasaysayaat no adda met laeng ti Registered Pharmacist ta maabisoanna pay dagiti umili a mapan gumatang ti agas kadagiti tiangge uray 2 a daras iti uneg ti maysa a lawas ti panagbisitana kadagiti sari-sari stores.
Innayonna a maysa pay a naigetda a trinatar ket ti maaddaan ti bukud a paggatangan ti agas dagiti Barangay Hall babaen ti panagbantay dagiti Barangay Health Workers ken Barangay Nurse.
Maipalagip a naimbitaran iti Committee Hearing ti Small and Medium Enterprise, Department of Trade and Industry, Department of the Interior and Local Government, Food and Drug Administration – Region 1 ken Presidente ti Drugstore Association of Ilocos Norte.
