LAOAG CITY – Nagun-od ti Sarrat National High School iti maika-15 a pwesto kas Outstanding School iti overall ranking manipod iti 495 a pampubliko ken pribado a pagadalan ditoy pagilian.
Daytoy ket kalpasan a nakaiyalat ti nasao a pagadalan ti pito a medalya ken maysa a merit award iti kaleplepas nga Hong Kong International Mathematical Olympiad (HKIMO) Heat Round.
Inpakaammo ni Mr. Michael Malvar, mangisursuro ken maysa a coach dagiti estudyante iti Sarrat National High School a naiyuswat ti kompetisyon idi Mayo 28, 2023 ken rimuar laeng ti resulta idi Hunyo 7.
Kuna na a manipod iti pito a medalya ket ket lima ditoy ti gold ken saggaysa ti siver ken bronze medal.
Innayun na a tallo kadagiti nakipaset ket Grade 7 iti Secondary 1 level, maysa ti Grade 8 iti Secondary 2 level, dua iti Grade 9 iti Secondary 3 level ken dua a Grade 10 iti Senior Secondary.
Nabigbig met dagiti estudyante a nakaiyalat ti balitok a medalya iti Grade 7: Allen Iver Barroga(ranked 2nd); Brian Jansen Vallejo; Natalie Margaret Balisacan; Zyrene Angelica Dulluog iti Grade 8; Ma. Cassandra Duque iti Grade 10.
Silver Medal ni Jushiem Barroga iti Grade 10, Bronze medal ni Mar Lean Malvar iti Grade 9, ken Merit award para kenni Arianne Rasalan iti Grade 9.
Kabayatanna, iti agdama ket manarimaan ti panagsagsagana dagiti nasao nga estudyante ken mangisursuro iti final round iti hongkong international mathematical Olympiad intunno Agosto 28, 2023 idinto a dagiti nakagun-od ti gold medal ket automatiko nga kwalipikado iti pannakilaban da iti World international Mathematical Olympiadfinal round idiay Hanoi, Vietnam intunno Disyembre 2023.
Mainaig iti datoy, inbatad ni Malvar a gapo iti pammadayaw, maipagpannakkel dagiti estudyante da iti sibubukel a pagadalan ken dakkel a pakaidaydayawan da.
Kunana pay nga ibilang da a dakkel daytoy a balligi ken blessing aglalo ket naisakto a selselebraran ti nasao a pagadalan ti 76th Founding Anniversary.
