LAOAG CITY – Napadayawan dagiti lima nga estudyante iti Sarrat National High School ken Sarrat North Central School kalpasan ti naiyuswat a Philippine Robot Qualifying Round.
Segun kenni Mr. Czearweiyn Caluya, instructor dagiti estudyante, nagun-od ti Sarrat Robotics G-Team dagiti pammadayaw kas kampeon iti Robot Story Telling iti senior category, 1st Runner-up iti Robot Innovation iti senior category ken 2nd Runner Up Robot Research iti senior category.
Nakaala met ti Sarrat Robotics B-Team ti Robot iBeam Line Tracing.
Nabigbig dagiti napadayawan a da Nadine Ann Faelmoca, Arianne Nicole Rasalan, Leizel Gantala kenni Jade Lhester Malejana iti Sarrat National High School kenni Kyle Rocero iti Sarrat North Central School.
Kuna ni Caluya, ti coach dagiti estudyante, a naiget ti nagdalanan da a panagsagana iti nasao a qualifying round para ti World Robotics Games 2022.
Gapu iti panangabak dagiti maseknan ket naaddaan da ti tsansa a makibalubal iti Final round a maangay idiay Thailand intono Disyembre 8 agingga iti Disyembre 12 ita a tawen.
Iti agdama, naiget ti panagsagsagana dagiti estudyante para ti nasao a kompetisyon.
