LAOAG CITY – Nailatang ti tallo gasut (300) a milyon a pisos para iti “scholarship program” ti Technical Education and Skills Development Authority wenno TESDA iti Ilocos Norte.
Imbatad ni Mrs. Cresencia Boac, Regional Operations Division Chief ti Technical Education and Skills Development Authority iti Rehion Uno a nakagasgasat ti Ilocos Norte ta naipaayan ti naruay nga scholarship program.
Kunana a dakkel a tulong ti alokasyon manipud opisina da Cong. Ferdinand Alexander Sandro Marcos iti umuna a Distrito ti probinsia ken ni Cong. Angelo Marcos Barba iti maikadua a Distrito ti probinsia.
Inpakaammo na nga iti agdama ket agtultuloy ti enrollment kadagiti kurso nga ididiaya ti Technical Education and Skills Development Authority ditoy probinsia.
Segun kenkuana, ita a bulan ti Agosto ket limapulo ket pito (57) a porsienton ti naipatungpal iti pundo para iti nasao a programa.
Mainaig iti daytoy, impatalged ni Boac nga ad-adda pay a mapasayaat ti kalidad ti training wenno panagsanay dagiti maseknan tapno maipasigurado nga adda ti umdas a “training providers” iti babaen ti scholarship program.
Innayonna a gagem daytoy a programa ti mangipaay ti trabaho kadagiti agturpos wenno maipaayan ti pamastrekan dagiti maseknan rason nga adda dagiti “tool kits” a maited kadakuada kalpasan nga agturposda.
