LAOAG CITY – Naitantan ita nga aldaw ti screening para iti 13th Lilia Cuntapay Short Horror Film Festival gapu iti pangta ti Super Typhoon Leon.
Gapu iti daytoy ket awan pay laeng ti maiyuswat a “film viewing” iti Ferdinand Edralin Marcos Stadium.
Maipakaammonto pay ti baro nga iskedyul dagiti nagduduma nga aktibidad iti Semana ti Ar-aria.
Mainaig iti daytoy, ti mangiyalat iti best picture ket mangabak iti duapulo ket lima ribu a pisos, 2nd Best Picture, duapulo ribu a pisos ken 3rd best picture ket sangapulo ket lima ribu a pisos.
Naammoan a dagiti dadduma pay a maipaay a pammadayaw ket best screenplay, best in sound effects, best in cinematography, best director, best actor ken best actress nga agpapada a maipaayan ti lima ribu a pisos.
Kabayatanna, adda ti sumurok-kumurang a 1,500 nga ubbing a makipaset para iti Trick or Treat iti Kapitolio Probinsial kas maibasar iti Ilocos Norte Tourism Office.
