LAOAG CITY – Pabor ni Atty. Donato Balderas Jr., ti Schools Division Superintendent ti Department of Education ditoy Ilocos Norte maipapan iti ilunglungalong ti Senado a gakat a pannakaipawil ti panagusar ti mobile device ken electronic gadgets kadagiti pagadalan iti oras ti klase.
Segun kenkuana, ti kinapudnona ket addan ti dati a pagannurutan ti Department of Education kas ti Department of Education Order No. 70 idi tawen 1999, Department of Education Order No. 26 idi tawen 2000 ken ti Department of Education Order No. 83 idi tawen 2003 a mangibagbaga iti pannakaipawil ti panagusar ti selpon dagiti estudiante iti uneg ti klase.
Inbatadna a no bilang naan-anay a maaprobaran ti nasao a gakat ket dakkel a tulong daytoy para kadagiti estudiante gapu ta ad-adda a makapokus dagitoy iti panagadal.
Kunana a nasken nga adda met ti pakaibilan dagiti selpon dagiti agad-adal ken rumbeng nga i-turn off wenno i-silent mode-da dagitoy tapno awan ti makaistorbo kabayatan ti panagklaseda.
Mainaig iti daytoy, inpakaammona a no mapaigetan ti panagusar ti selpon para kadagiti estudiante ket masapol met nga adda ti pagannurutan a masurot para kadagiti mangisursuro.
Inlawlawagna nga awan met pay ti datosda maipanggep no adda dagiti agad-adal a bimmaba ti gradoda gapu iti panagusar ti mobile device ken electronic gadgets.
Inpalgakna a ti 21st Century ket saan a kayatna a saoen ket agpapada a mobile device ken electronic gadgets ti mausar no di ket kasapulan met ti communication skills, collaboration skills, abstract, critical thinking ken dadduma pay.
Maipalagip nga iti babaen ti Electronic Gadget-Free Schools Act wenno iti Senate Bill No. 2706 nga inpila ni Sen. Sherwin Gatchalian, sakupen ti gakat dagiti agad-adal iti kindergarten agingga iti senior high school kadagiti pampubliko ken pribado a pagadalan. Maipawil pay kadagiti mangisursuro ti panagusar kadagiti mobile devices ken electronic gadgets iti oras ti klase.
Immuna iti daytoy, rimmuar iti resulta ti 2022 Programme for International Student Assessment a 8 kadagiti 10 nga agtawen ti 15 nga agad-adal ti naipadamag a mariribukanda iti panagusar ti smartphone iti klase.
