LAOAG CITY – Naiget a maisaysayangkat ti search and rescue operation para kadagiti survivors iti nakaro a layos idiay Texas, United States of America a nakatayan ti 51 pakairamanan ti 15 nga ubbing.
Adu a tattao ti matmaturog idi ngimmato ti danum iti Guadalupe River a dimmanon iti 26 a kadapan iti uneg laeng ti nakurkurang ngem maysa nga oras.
Basar kadagiti opisial ti Kerr County, adda ti 27 nga ubbing ti mapukpukaw manipud iti Christian youth camp a masarakan iti asideg ti karayan ken agarup 850 nga indibidual ti naisalakan.
Ad-adda a naapektaran ti nakaro a layos ket dagiti mobile homes, summer camps ken camping sites no sadinno a naruay dagiti naguummong para iti holiday celebrations idi Hulio 4.
Iti maysa a press conference, inrakurak ni Texas Governor Greg Abbott a nagpirma daytoy para iti naig-iget a disaster declaration para iti agtultuloy a search operation.
Naammoan a namin-adu a daras a nagsubli dagiti rescuers iti Guadalupe River tapno sapulen dagiti mapukpukaw nga indibidual a mabalin a naiyanod gapu iti nakaro a layos.
Kabayatanna, inpasingked ni United States President Donald Trump a manarimaan ti pannakikoordinar ti administrasionna kadagiti lokal nga otoridad para iti al-alisto a pannakaipaay ti tulong kadagiti biktima.
