LAOAG CITY – Negatibo ti naiyuswat a search operation iti pagtaengan ni Romeo Andres iti Brgy. Estancia iti ili ti Piddig.
Daytoy ket awan ti nakrekobre dagiti kameng ti search team a disnesignaran ni Police Captain Kristoffer King Ramos, hepe ti PNP Piddig.
Segun kenni Andres, nagyaman da awan ti naala dagiti otoridad kalpasan ti panagsukimat ti search team.
Kuna a ti laeng klase ti paltog nga ik-ikoten na ket para iti panaganop iti kallabes.
Kabayatanna, gapu ti panagnegatibo ti search operation ket inpasingked ni Ramos nga agtultuloy ti panagmonitor da ken panagvalidate kadagiti maipagarup nga adda ti pannakainaig na iti iligal nga aktibidad.
Immunan nga inpakaammo ni Ramos a mainaig iti pannakabirok ni Andres ti paltog ket nangiyuswat da ti imbestigasyon, panagvalidate kadagiti reports kontra iti subject rason nga adda ti rimwar a search warrant.
Maipalagip a nakabirok ni Andres ti maysa a paltog iti asideg ti pagtaengan da iti kallabes a banag nga inreport na iti barangay chairman ken naitawag iti PNP Piddig para iti pannakarekobre na.
Kuna met ni Barangay Chairman Philemon Balgona nga idi nakita da ti paltog a nakasupot ket atapen na a nabayagen a naipan iti sirok ti kayo gapu ta aglatlati daytoy.
Naiyuswat ti search operation gapu ti naipatungpal a search warrant a maibagbaga ditoy nga adda ti maipagarup nga ikikoten ni Andres a kalibre 38 a paltog ken dagiti bala na.
