LAOAG CITY – Naarestar idiay Prague, Czech Republic ti pugante a ni dati nga Ako Bicol Representative Zaldy Co kalpasan a simrek iti nasao a pagilian nga awanan ti umno a dokumento.
Daytoy ti kinumpirmaran a mismo ni Presidente Ferdinand Marcos Jr. ita nga Huwebes, Abril 16, 2026.
Iti agdama ket addan iti kustodiyar ti Czech authorities ni Co kabayatan ti pannakikoordinar ti gobierno ti Pilipinas tapno maisayangkat dagiti legal nga addang para iti pannakaisubli na a dagus ditoy Pilipinas.
Sumangsango ni Co iti sumagmamano a kaso kriminal mainaig iti maipagarop a korapsyon iti national budget, partikular dagiti proyekto a pang-imprastraktura.
Maikonkonektar pay ni Co iti maysa a kumpanya a nakaala ti binilyon a pisos ti kontrata iti gobyerno, karaman ti maysa a flood control project nga agbalor ti P289 million iti Naujan, Oriental Mindoro a maibagbaga a substandard.
Maipalagip a naglemmeng ni Co sipud pay idi Hulyo 2025 kalpasan a naibutaktak dagiti maipagarop a maanomalya a pannakagastos ti pondo ti gobierno, a nangitunda ti panagikkat na it pwesto.
Kabayatanna, naglikudan amin ni Co dagiti alegasyon kenkuana, ken inpetteng na nga adda ti pangta iti biagna ken maipagarop a pulitikal dagiti kaso a naipila kontra kenkuana.
