LAOAG CITY – Temporaryo a nasuspenso ti panagbiruk kadagiti mapukpukaw a mammallot iti Taal Lake kalpasan ti namintallo a daras a panagbettak ti Taal Volcano iti kallabes.
Daytoy ti inbatad ni Justice spokesperson Atty. Polo Martinez.
Nupay kasta, inpasigurado ni Martinez a naka-standby latta amin dagiti operating units ken maituloy a dagus ti operasyon apaman a sumayaat ti kondisyon ti lugar.
Immunan nga inrakurak ti Philippine Institute of Volcanology and Seismology a nakairekord da ti 33 a volcanic earthquakes iti Taal Volcano idi domingo, Oktubre 26.
Maipalagip nga agingga idi Oktubre 12 ita a tawen, inbatad ti Department of Justice nga addan ti narekobre a 887 a tulang ti tao manipod iti Taal Lake.
Nangrugi ti operasyon iti Taal Lake kalpasan nga inbutaktak ni whistleblower Julie “Dondon” Patidongan nga adda ti nasurok a 100 a mammallot ti napapatay ken naibelleng dagitoy iti nadakamat a lugar.
