Search warrant operation iti pagtaengan ti dati a kapitan ken ti kabsat na iti Brgy. Pangil iti ili ti Pasuquin, negatibo ti resulta na

LAOAG CITY – Negatibo ti resulta ti search warrant operation nga insayangkat ti PNP iti Barangay Pangil iti ili ti Pasuquin.

Ti subject ti operasyon ket da dati a kapitan Fernando Salvador ken ti kabsat na a Christopher Salvador.

Ti search warrant ket inparuk-at ti 2^nd Municipal Circuit trial Court iti ili ti Pasuquin gapo iti panaglabsing iti RA 10591 wenno iligal a panagikot ti paltog.

Basar iti search warrant, ti maipagarop nga ikot ni Fernando ket maysa a carbine ken bala idinto a ni Christopher ket maysa a kalibre 45 a paltog ken bala.

Mainaig iti daytoy, maragsakan ni Police Captain Michael Permison, deputy chief of police ti PNP-Pasuquin gapo ta negatibo ti resulta ti inyuswat da nga operasyon ken napaneknekan nga awan ti ikot da a kontrabando.

Kabayatanna, patien ni dati a kapitan Salvador nga adda ti maris pulitika ti naiyuswat nga operasyon iti pagtaengan da iti kabsat na.

Innayon na nga idi tawen 2017 ket naiwayat manen ti operasyon iti pagtaengan da iti kabsat na.