LAOAG CITY – Inlawlawag ti Malacañang a saan a kasapulan nga agikkat ni Secretary Sonny Angara iti Department of Education (DepEd) no nadalus daytoy manipud kadagiti nagduduma nga isyu.
Daytoy ket kalpasan ti panagikkat dagiti sumagmamano a Cabinet officials iti pwesto da gapo iti pannakairaman ti nagan na iti insertions iti 2025 budget.
Segun kenni Communications Undersecretary Claire Castro, no ti pammati ni Angara ket saan a karama iti isyu ket saanen a kasapulan nga agisubmitir ti resignation na.
Maipalagip nga innaganan ni dati a Public Works Undersecretary Roberto Bernardo ni Angara a maysa kadagiti dati nga agpanpanday linteg a nabenepisyaran iti kickbacks manipud iti ghost wenno substandard flood control projects.
Ni Angara a dati a nagserbi kas Senate Finance Committee chairperson ket ummunan a naglikudan a ti alegasyon kontra kenkuana ken kunana nga iti 21 a tawen a panagserbi na iti gobierno ket saan pay a pulos a nairaman iti isyu ti kurapsyon.
