LAOAG CITY – Nagtalinaed ti takder ken mamati ni Department of National Defense (DND) Secretary Gilberto Teodoro nga awan ti kalkaluban ti administrasyon mainaig kadagiti agtultuloy nga imbestigasyon ti Independent Commission for Infrastructure (ICI) ken uray ti Office of the Ombudsman mainaig paylaeng kadagiti maanomalya a flood control projects iti pagilian.
Iti maysa nga interview, inlawlawag ti sekretaryo a nupay mamati nga awan ti kastoy a sistema ti administrasyon mainaig iti imbestigasyon dagiti nasao nga ahensya ken inrakurak na a kabayatan a bumaybayag ket saan a maikkat iti publiko ti agdudua iti possible nga adda dagiti makalkaluban iti imbestigasyon.
Daytoy ket mainaig kadagiti manarimaan nga imbestigasyon nga agpapan ita ket awan pay ti maitudo a personalidad kalpasan ti sumagmamano a bolan sipud nangrugi ti panagimbestigas seknan kadagiti flood control scandal.
Kabayatanna, inrakurak pay ni Teodoro nga agtultuloy a kumapkapuy ti estado ti pagilian gapu kadagiti nagbalin nga isyu maipanggep iti korapsyon ken uray iti politikal nga aspeto a rason met tapno agbalin nga arigna mabisbisin ti umili iti hustisya ken mapagsungbat dagiti karaman kadagitoy nga isyu.
