LAOAG CITY – Nagbalin nga emosional ni Mrs. Abigail Laciste, coach ti Secondary girls Athletics iti Laoag City ti panagbalin ti teamda nga Overall Champion no sadinno a nakagun-od da ti 6 golds, 2 silvers ken 4 bronze medals iti Athletics ti Region 1 Athletic Association.
Segun kenkuana, iti unos ti 10 a tawen a panagbalin nga athletic coach nangruna iti secondary girls category ket daytoy ti immuna a gundaway a nakagun-od da ti ado a balitok.
Inpettengna nga adda ti nagbanagan ti 3 bulan a panag-training dagiti atleta-da no sadinno ti tallo nga atleta ket nakagun-od ti lima balitok a medalya ken ti maysa ket nagun-od ti 4×4 team relay.
Inpakaammona nga ipaay da dagiti nagun-od da a medalya iti pimmusay nga atleta kabayatan ti training idi Marso 22.
Nupay a nagbalin a naladingit ti kapadasanda ngem saan daytoy a nanglapped ti pannakagun-od da ti 13 a medalya a balitok ti Athletics Team ti Schools Division iti Laoag City.
Kabayatanna, agyaman daytoy kadagiti pada na a mannursuro ken coaches gapu iti sakripisio nga indiaya da kadagiti atleta bayat ti training da ken nangruna ken ni Mayor Micheal Marcos Keon ditoy siudad gapu iti inpaayna a National ken Local trainers kas katulngan a mang-ensayo kadakuada.
