LAOAG CITY – Agtultuloy a maag-agasan iti Bangui District Hospital ti maysa a security guard kalpasan nga aksidente a napaltugan na ti bukod na a bagi kabayatan a nakaduty iti Barangay Pancian iti ili ti Pagudpud.
Nabigbig daytoy a ni Nestor Jose y Curammeng, agtawen ti 49, naasawaan, security guard ken residente iti Barangay Saud iti ili ti Pagudpud.
Iti inisyal nga imbestigasyon, kabayatan a nakaduty ni Jose ket dinalusan na ti service firearm na a maysa a 9mm pistol, addaan ti lima a bala ken maysa a fire cartridge.
Nupay kasta, iti panang-assemble ni Jose ti paltog na ket ditoy nga aksidente a napaltugan na ti akin-kannigid a saka na ken simmarot pay ti bala iti akin-kannigid met laeng a luppo na.
Agtultuloy ti imbestigasyon dagiti otoridad mainaig iti daytoy a pasamak.
