LAOAG CITY – Naminsan manen nga inlungalong ni Senadora Loren Legarda ti food security wenno seguridad iti taraon kageddan dagiti damag ti panagngato ti hunger rate ditoy Pilipinas.
Madanagan ni Legarda ti damag a mangipakpakita ti panagngato ti antas ti panagbisin kadagiti Pilipino iti intero a pagilian a rumrummuar a kangatoan sipod nangrugi ti COVID-19 idi 2020.
Basar iti survey nga inruar ti Social Weather Stations (SWS), Enero 14, 25.9% kadagiti Pilipino ti nangibaga a makapaspasarda ti panagbisin, maysa a daras iti napalabas a tallo a bulan.
Naammoan a ti Mindanao ti nakairekord ti kangatoan nga antas ti panagbisin a dumanonen iti 30.3% a sinaruno ti Luzon iti 25.3%, Visayas a nakairekord ti 24.4% ken Metro Manila iti 22.2%.
