LAOAG CITY – Maladingitan ni Sen Jv Ejercito para ti sektor ti agrikultura ti Pilipinas gapu ta nakita na a nabaybay-an daytoy rason pay a bimmaba ti produksyon.
Kuna na a ti Pilipinas ti dati a nadur-as ti agrikultura na nga isu ti kaaduan ti produksyon ngem itan ket isu metten ti agang-angkat kadagiti produkto iti sabali a pagilian.
Inbatad ni Ejercito a ti kangrunaan a nakaigapu ti panagbaba ti produksyon ti agrikultura ket ti panagraira ti smuggling.
Amin a mannalon ket nababa payen ti masapulan da gapu kadagiti sumagmamano a negosyante ket kaykayat ti aglakon kadagiti smuggled a produkto ti agrikultura.
Mainaig iti daytoy, kuna ni Ejercito a pimmasa ti inlungalong na a gakat nga Anti-agricultural Smuggling Act nga agserbi a proteksiyon dagiti mannalon kontra ti smuggling a maibilang nga heinous crime ken economic sabotage ditoy pagilian.
Mangnamnama ni Ejercito a babaen ti nasao a gakat ket malapdan ti smuggling tapno dumur-as manen ti sektor ti agrikultura ti Pilipinas.
