LAOAG CITY – Simple laengen ti pannaka-selebrar ti Chinese New Year idiay South Korea gapu iti agdama a pandemya a gubuay ti cvid-19 virus.
Daytoy ti report ni Bombo International Correspondent Mark Isaac Doctolero iti South Korea.
Inbatad na a ti maysa a sagsaganaan dagiti South Koreans ket ti Chinese New Year gapu ta idi un-unana ti lenggwahe da ket chinese, ngem iti panagtulid ti panawen ket nagbaliw ti kultura dagiti South Koreans ngem nagtalinaed ti puso da kas Chinese.
Inpakaammo na a kas paset ti panangselebrar dagiti South Koreans ti chinese new year ket maikkan dagiti mangmangged ti tallo nga aldaw a bakasyon tapno makadenna da dagiti ipatpated da iti biag.
Segun ken ni Doctolero, idi awan pay ti pandemya ket ado dagiti maiyus-uswat nga aktibidad iti kada munisipyo ken makita dagiti nagagarbo a dekorasyon iti tunggal balay.
Nupay kasta, gapu iti pandemya ket saanen a mabalin nga agdudupudop dagiti ado a tattao isut gapuna nga iti pannaka-selebrar ti chinese new year ita nga aldaw ket dagiti laengen agkakapamilya ti agkakadwa.
