LAOAG CITY – Nasugatan ni Self-confessed drug lord Kerwin Espinosa, agpaidasig a para mayor iti Albuera, Leyte, kalpasan a napaltugan kabayatan ti pannakitaripnong na kadagiti leader iti Barangay Tinag-an iti ili ti Albuera.
Basar iti Philippine National Police, pinaltugan ti saan pay a nabigbig a suspek a naglemmeng iti ceiling ti stage ni Espinosa kabayatan nga ur-urayen na ti panagsarita na.
Malaksid ken ni Espinosa, nairaman pay a nasugatan ti menor de edad iti Barangay Tangas, ken ni Mariel Espinosa Marinay, nga agpaidasig met a para bise mayor.
Agpapada a naitaray iti ospital dagiti biktima para iti naan-anay a pannakataming da.
Nangipatungpal a dagus dagiti kameng ti pulisya iti ili ti Albuera ti checkpoints kabayatan ti hot pursuit operation kontra iti suspek.
Kabayatanna, kinondenar ni Commission on Elections Chairman George Garcia ti insidente ken inpetteng na a masapol a maarestar ken maipaayan ti hustisya dagiti biktima.
Inpaganetget na a ti eleksyon ket saan a maipanggep iti panagpatay no di ket mangbiag iti demokrasya.
Innayon na a balota saan ketdi a bala ti sungbat dagiti problema.
