LAOAG CITY – Nag-walk out ni Senador Nancy Binay iti hearing ti Senate committee on accounts nga idauluan ni Senador Alan Peter Cayetano a mangsuksukimat iti gastos ti baro a pasdek ti Senado a maipaspasdek iti Taguig no sadinno makunkuna a dimmanon iti P23 billion a pondo.
Segun ken ni Cayetano, nangisayangkat ti komitena iti inspeksion ti proyekto iti baro a pasdek ti Senado kalpasan a mapansin ni Senate President Sen. Francis “Chiz” Escudero ti dakkel a pondo a nailatang iti daytoy.
Mainaig iti daytoy, bayat iti hearing, inpaganetget ni Binay, dati a chairperson ti komite nga iggem itan ni Cayetano, a P21 billion laeng ken saan a P23 billion ti nailatang para iti nasao a proyekto.
Nupay kasta, intaginayon ni Cayetano a ti pondo a pagsasaritaan ket P23 billion, pakairamanan ti P1.6 billion para iti panaggatang iti daga.
Nangrugi a nagbalin a nabara ti diskusion dagiti dua a senador ken nagpaut iti sumagmamano a minuto idi kinuna ni Binay a saan koma nga agpadispensar ti Department of Public Works and Highways (DPWH) iti Senado, kas iti kayat ni Cayetano a maipagarup a gapu kadagiti rekord a naiparang iti komite.
Ti Department of Public Works and Highways ti mangimatmaton iti construction project para iti baro a pasdek ti Senado iti Taguig.
Inakusaran ni Cayetano ni Binay a kayatna a riribuken ti hearing ken mapapati a kayatna nga isilpo ti nagabaetan ti Makati ken Taguig.
Nagtultuloy ti sungbat agingga a dinamag ni Binay iti Department of Public Works and Highways no adda P23 billion a nailanad iti dokumentoda mainaig iti gastos iti baro a pasdek ti Senado.
Simmungbat ni Department of Public Works and Highways Undersecretary Emil Sadain nga awan maipanggep iti nasao a banag.
Kabyatanna, iti ambush interview, kinuna ni Binay a naipalagip kenkuana a ti nasao nga hearing nga inaramid ni Cayetano iti napasamak a Senate investigation ifi idi 2015 iti Makati City Hall Parking Building, a proyekto ti amana, dati a Bise Presidente Jejomar Binay.
