LAOAG CITY – Naminsan manen a naelektaran ni Senador Francis “Chiz” Escudero kas Senate President kalpasan a nakagun-od ti 19 a butos kontra iti 5 a butos para ken ni Senador Vicente “Tito” Sotto III.
Naisayangkat ti panagbubutos iti panaglukat ti umuna a regular a sesyon ti 20th Congress itay bigat ita nga aldaw ti Lunes, Hulio 28, 2025.
Basar iti maipatpatungpal a pagannurotan ti Senado, ti naabak a kandidato iti eleksion para iti Senate President ket otomatiko nga agbalin a minority leader.
Makaduana dagiti Senador a nagbutos kenkuana kas baro a minoria.
Kabayatanna, dagiti nagbutos ken ni Escudero ket isuda ti agbalin a baro a mayoria.
Ti eleksion ket naiyuswat sakbay pay ti State of the Nation Address (SONA) ni Presidente Ferdinand Marcos Jr.
Naammoan a kalpasan a naelektaran ti mangidaulo iti Senado ket simmaruno ti panangbukel kadagiti komite ken panangtalantan kadagiti nailungalong a gakat para iti baro a sesyon ti Kongreso.
