LAOAG CITY – Maibilangen ni Senador Ronald “Bato” dela Rosa kas armado ken narisgo iti baet ti maipatpatungpal nga standard protocols iti panangarestar kenkuana tapno iserbi ti arrest warrant nga inyisyu ti International Criminal Court (ICC).
Daytoy ti nagbalin a sungbat ni National Bureau of Investigation (NBI) Director Melvin Matibag idi nasaludsod no maikonkonsiderar ti senador kas armado ken narisgo kalpasan a timmalaw iti premises ti Senado iti parbangon ti Mayo 14 kagiddan ti shooting incident ken saan pay a masinunuo no sadinno a lugar ti ayanna iti agdama.
Inlawlawag pay ti NBI chief a paset ti standard protocol a no mangiwaywayatda ti operasion wenno birbiroken ti pugante, ibilangdan daytoy nga armado ken narisgo.
Immunan a nangbukel ti NBI ti maysa a grupo tapno biroken ti senador a maibilang kas maysa pugante.
Kabayatanna, inbilin metten ni Matibag dagiti adda iti babaenda iti district ken regional offices ti NBI tapno mangiwayat ti bukud a monitoring iti sakupenda a lugar para iti posible a lead a makaitudo iti ayan ti senador.
