LAOAG CITY – Ilunglungalong ni Senador Erwin Tulfo ti maysa a gakat a mangikkat iti sweldo ken allowances dagiti nangangato nga opisyal ti gobierno no dagitoy ket absent nga awan ti nalawag ken valid a rason.
Iti babaen ti gakat, sakopen na daytoy ti presidente, bise presidente, dagiti senador, kongresista, cabinet secretary ken dadduma pay a department heads.
Segun ken ni Tulfo, gagem ti gakat nga ipatungpal ti patas a pagannurutan a ‘no work, no pay’ iti babaen dagiti ordinaryo nga empleyado ti gobyerno ken dagiti nangangato nga opisyal.
Karaman pay iti gakat ti panangibabawi kadagiti allowances dagiti opisyal nga absent without proper leave (AWOL), tapno masigurado ti pagsungsungbatan iti serbisyo publiko.
Inpetteng na pay a nagbalinen a nakairuwaman ti kastoy a sistema no sadinno nga adda dagiti opisyal nga agtultuloy nga agaw-awat ti sweldo uray nabayagen a saan a sumsumrek iti trabaho.
Kabayatanna, immunan a naireport a ni Senador Ronald ”Bato” dela Rosa ket saanen a nakaatendar iti sesyon ti Senado iti uneg ti sumagmamano a bolan, idinto a ni Senador Jinggoy Estrada ket nagkiddaw nga isardeng ti panagsuweldo na kabayatan a daytoy ket temporaryo a saan a nakapagtrabaho kalpasan a naarestar.
