LAOAG CITY – Inbatad ni Senate blue ribbon committee chairman Senator Panfilo “Ping” Lacson a saan pay a naan-anay a nailisi da Senator Jinggoy Estrada ken Sen. Joel Villanueva mainaig iti budget insertion issues iti baet ti imbestigasyon iti anomalya a flood control projects.
Segun kenni Lacson, ti panangipalubos na kadagiti dua a senador a mangsango kadagiti mangak-akusar kadakuada ket saan na a kayat na a sawen a nailisi dan iti isyu.
Ti madakdakamat nga isyu ket ti budget insertions nga adda ti pakainaigan na iti infrastructure projects iti Bulacan nga agbalor ti P600M ken P355M nga isu ti akusasyon ni Engr. Brice Hernandez.
Iti agdama ket awan met pay ti komento ni Estrada ken Villanueva mainaig iti rakurak ni Lacson.
Maipalagip nga inbatad ni Lacson kabayatan ti Senate hearing a ti P600 million a para kuma iti flood control projects idiay Bulacan ket nakita iti Unprogrammed Fund iti babaen ti 2023 General Appropriations Act (GAA), no sadinno inkonektar ni Hernandez ni Villanueva ngem naglikudan daytoy ti senador.
Kabayatan iti hearing, inpakita ni Villanueva no kasano ti kaalisto ti panagparbo ken panag-edit kadagiti ladawan iti mobile phones.
Basar kenni Hernandez, ti maipagarop a flood control projects a maipagarop a pakairamramanan ni Villanueva ket manipud iti unprogrammed funds iti 2023 General Appropriations Act.
Naamoan nga adda ti pito agingga iti walo nga items nga agbalor iti P75 million iti tunggal maysa ken agdagop iti P600 million kageddan ti panangibaga ni Lacson nga addaan ti ‘selective memory’ ni Hernandez gapo ta saan na a masungbatan dagti saludsod.
Kabayatanna, kuna ni Lacson a naduktalan ti opisina na iti regular budget ti 2025 General Appropriations Act ti P355 million iti infrastructure projects idiay Bulacan a nangakusaran ni Hernandez kenni Estrada a naiget a naglikudan ti senador.
Ummuna metten nga inbatad da Villanueva ken Estrada a umannugot da nga agpirma ti waivers para iti pannakalukat ti bank accounts da.
