LAOAG CITY – Inpetteng ni Senador Sherwin Gatchalian nga obligasyon ti Senado nga ag-convene iti kanito a maisumitir ti Articles of Impeachment kontra ken ni Vice President Sara Duterte.
Segun ken ni Gatchalian, nalawag iti Konstitusyon a masapol a “forthwith” wenno dagus trataren ti kaso iti kanito a maawat ti Senado ti impeachment complaint manipod iti kamara de representantes.
Rakurak daytoy ni Gatchalian kalpasan ti manamnama a panagbotos ti kamara de representantes ita nga aldaw ti Lunes, Mayo 11 no ipasa iti Senado ti Articles of Impeachment kontra ken ni Duterte.
Kuna pay ni Gatchalian a possible nga ag-convene ti impeachment court intono Mayo 13 no maipatulod a dagus iti senado ti impeachment complaint intono Martes basar iti immuna a nagbalin a rakurak ni Senate President Vicente “Tito” Sotto III
Nupay inlawlawag ti Korte Suprema nga adda ti discretion ti Senado iti interpretasyon ti sarita a “forthwith,” kuna ni Gatchalian a saan a rumbeng nga agbalin a lapped daytoy tapno maitantan ti proseso.
Segun pay iti senador, napateg a matuloy ti impeachment trial tapno maikkan ti gundaway ti agpada a kampo ti prosekusyon ken depensa a maidatag dagiti argumento ken ebidensya da.
Kabayatanna, saan met nga inserra ni Gatchalian ti posibilidad a maaddaan dagiti mosyon wenno addang tapno malapdan ti panangbukel ti impeachment court, kas ti napalabas iti napalabas a kongreso.
Nupay kasta, kuna na a masapol nga adda ti nalawag a legal a pagibasaran ti aniaman nga ipila nga addang.
