LAOAG CITY – Nagpanawagan ni Senador Sherwin Gatchalian iti Energy Regulatory Commission (ERC) a lapdan ti dakkel a pagngatoan ti singir iti kuryente ken siguradwen a maipatungpal daytoy ng in-inot tapno saan a mabigla ti bulsa dagiti ordinaryo a consumer.
Iti maysa nga statement, inpetteng ti agpanpanday linteg a masapol ti naiget a panangbantay ti komisyon ti electricity rates iti pagilian ken naan-anay nga ipawil ti sistema nga one-time, big-time a nayun ti singir dagiti distribution utilities.
Segun ken ni Gatchalian, ti in-inot a pannakaipatungpal ti pannaipangato ti singir iti kuryente a magudua iti uneg ti sumagmamano a billing cycle ket maysa a praktikal a solusyon tapno maalay-ayan ti epektona iti publiko.
Nagpalagip ti senador a ti sektor ti enerhiya ket maysa a regulated industry.
Gapu iti daytoy, inpettengna ti kangrunaan a mandato ti Energy Regulatory Commission nga agtignay, agbalin naridam ken protehiran ti umili kontra kadagiti saan a nainkalitegan a bayadan nga ad-adda a mangpadagsen iti inaldaw a paggastusan dagiti Pilipino.
Iti babaen ti maipatpatungpal nga Electric Power Industry Reform Act (EPIRA), limitado ti bileg ken pannakibiang ti gobierno iti direkta a pannakaikeddeng ti presyo ti kuryente iti merkado.
Nupay kasta, inlawlawag ni Gatchalian nga adda ti otoridad paylaeng ti gobierno a makiballaet ken agaramid ti maiyannatop nga addang aglalo a no ti kangrunaan a rason ti panagngato ti presyo ket ti kinakurang iti supply ti enerhiya.
