LAOAG CITY – Binabalaw ni Sen. Imee Marcos ti 2025 proposed budget gapu iti maipagarop a saan a nasayaat a linaon daytoy.
Maipalagip a ti 2025 budget ket agpada nga inaprubaran dagiti mangibagi ti dua a pagpandayan linteg iti kongreso iti babaen ti bicameral conference committee.
Segun iti presidential sister, nalabsing ti konstitusyon iti pinal a bersyon ti 2025 proposed national budget isut gapuna a rumbeng a marepaso ken isubli iti Bicameral Committee.
Innayon na a mabalin pay nga urnusen manen ti Bicameral Committee ti nasao a budget ket pagpadaen dagiti linaon na.
Nagtalinaed ti takder ti senadora a ti 2025 budget ket manglablabsing saan laeng nga iti sumagmamano a linteg no di ket uray iti karirikna ti umili.
Inrakurak pay ti presidential sister a kabaelan pay nga ikamat sakbay ti iseserrek ti 2025.
