LAOAG CITY – Madanagan ni Senador Imee Marcos a posible a saan a bumaba ti presio dagiti produkto a petrolyo ditoy pagilian uray temporario nga isuspenso wenno kissayan ti excise tax.
Agdudua ti Senadora no pudno a marikna ti panagbaba ti presio ti petrolyo no maipatungpal daytoy.
Inbatad ni Marcos, ti ad-adda a mabenepisiaran iti nasao nga addang ket dagiti importer gapu ta isuda ti agbaybayad ti buis ken posible a saan nga ipasa dagiti korporasion ti diskuento iti publiko.
Kunana a dakkel ti mapukaw a biruk iti gobierno isu a nasaludsodna no ayanno ti pangalaan ti pundo para iti ayuda no makissayan ti koleksion.
Inpettengna manen a nasaysayaat no value-added tax laengen ti isuspenso tapno direkta a marikna ti publiko ti epekto ti panagbaba ti presio ti gasolina, LPG ken dadduma pay a produkto a petrolyo.
