LAOAG CITY – Nagpanawagan ni Sen. Imee Marcos iti gobierno a tulongan da nga agawid ditoy dagiti amin a Pilipino nga adda iti Middle East.
Daytoy ket gapu pay laeng ti kumarkaro nga air and ground operations ti Israel idiay Lebanon.
Segun ken Sen. Imee Marcos, mangidadaulo ti Senate Committee on Foreign Relations, masapul bga agtignay ti Department of Foreign Affairs (DFA) ken Department of Migrant Workers (DMW) nga ibakwit amin a Pilipino manipud kadagiti napeggad a lugar iti Lebanon ken isublida ida ditoy Pilipinas iti kabiitan a panawen.
Kunana a napeggad unayen ti kasasaad idiay Lebanon gapu iti agtultuloy a panangraut ti eroplano ti Israel iti Beirut ken adda posibilidad a papigsaen da pay puersa da kadagiti makin-abagatan a paset ti pagilian.
Basar iti rekord ti Lebanese health ministry, nasurok a 2,000 a tattaon ti napapatay iti panagdadangadang.
Inbatad pay ti Senadora a ti kasasaad idiay ket maysan nga Alert Level 4 Crisis, ken nakabutbuteng no ad-adu pay a sibilian, agraman dagiti Pilipino, ti madangran wenno mapapatay.
Gapu iti daytoy, naiget nga idagadag na kadagiti amin a maseknan nga ahensia ti gobierno nga irugida a dagus amin a kasapulan nga addang tapno masigurado ti kinatalged dagiti apektado a Pilipino.
