LAOAG CITY – Inlawlawag ni Senate President Pro Tempore Ping Lacson no kasanu nga inpatungpal ti dati da a grupo a minority bloc a bukbuklen ti lima a senador ti “kudeta” tapno mapadisi iti pwesto a Senate president ni Senador Francis “Chiz” Escudero, ken balligi a naisukat iti pwesto ni Senador Tito Sotto.
Segun ken ni Lacson, nagtaripnong ti dati a minority bloc a bukbuklen na kadwa na da Sens. Sotto, Risa Hontiveros, Loren Legarda, ken Migz Zubiri idi Biyernes tapno pagsasaritaan ti pannakapadisi iti pwesto ni Escudero.
Kuna na nga idi weekend a nangrugi da a nagkalap ti suporta manipod kadagiti pada da a senador para ken ni Sotto tapno agsukat ti liderato iti Senado.
Inpalgak na a sakbay a nangrugi ti sesyon idi Lunes ket inpakada da Lacson ken ni Escudero nga addan ti umdas a bilang dagiti senador tapno pagbalinen a senate president ni Sotto.
Daytoy ti makaigapu nga idi nagmosyon ni Zubiri nga indeklarar na a bakante ti posisyon ti senate president ket awanen dagiti kimmontra, uray idi nainominar ni Sotto kas baro a lider ti senado.
Inadmitir ni Lacson a saanda a unay a narigatan a nakaala ti umdas a numero tapno masukatan ni Escudero.
Iti baet ti panagsukat ti liderato iti senado, kuna ni Lacson a “very graciously” nga inawat ni Escudero ti desisyon dagiti senador ken naaddaan da ti naurnus a transition.
Kalpasan ti opisyal a pannakapili ni Sotto kas Senate president, naelektaran met ni Lacson kas baro a Senate President Pro Tempore kasukat ni Senador Jinggoy Estrada idinto a napili met ni Zubiri kas baro a Senate Majority Leader, kasukat ni Senador Joel Villanueva.
Karaman kadagiti nangsuporta tapno pagbalinen a baro a lider ti senado ni Sotto ket isuda Sens. Risa Hontiveros, Bam Aquino, Loren Legarda, Kiko Pangilinan, Camille ken Mark Villar, Pia Cayetano, Erwin ken Ruffy Tulfo, Sherwin Gatchalian, Lito Lapid, ken JV Ejercito.
