LAOAG CITY – Inpetteng ni Senate President Pro Tempore Panfilo Lacson nga awan ti umdas a pangibasaran a mangikonektar ken ni dati nga House Speaker ken Leyte Rep. Martin Romualdez iti anomalya iti flood control scandal.
Segun iti Senador, iti baet nga adda dagiti sumagmamano nga alegasion a mangikonkonektar iti dati nga House leader iti naibutaktak nga anomalya iti flood control, awan ti umdas nga ebidensia a mangipakita wenno mangipaneknek ti pannakaikonektarna iti nasao nga iskandalo.
Immuna a nairuar ti inisyal a report ti Senate Blue Ribbon Committee a mangirekrekomendar iti panangipila ti kaso kontra kada Sen. Chiz Escudero, Sen. Jingoy Estrada ken Sen. Joel Villanueva ken dadduma pay a nangangato nga opisial.
Nupay kasta, iti nabaliwan a partial report, binaliwan daytoy ken inrekomendar iti pannakaiwayat ti preliminary investigation kontra kadagiti nadakamat a nagan.
Saan latta a nairaman iti revised report ti nagan ni Romualdez.
Inlawlawag ni Sen. Lacson nga agserserbi kas Chairman ti nasao a komite, ti rekomendasion para ken ni Romualdez ket ti agtultuloy a fact-finding efforts ken ti posible a panangbukel ti kaso kontra kenkuana.
Karaman ditoy ti financial scrutiny wenno panangtingiting iti kinabaknang ti presidential cousin.
Kunana a napateg ditoy ti tulong ti Anti-Money Laundering Council (AMLC).
Iti agdama, ti laeng pangibasaran ti komite ket ti nagbalin a testimonia ti kontrobersial a witness a ni Orly Guteza.
Iti baet daytoy, nagtalinaed latta ti posibilidad nga agbaliw met ti estado ni Romualdez iti pinal a committee report kabayatan nga agtultuloy latta ti imbestigasion ti Senado mainaig iti naibutaktak nga iskandalo.
