LAOAG CITY – Inrekomendar ni Senador Ping Lacson a tingitingen ti Philippine Juvenile Justice Law kalpasan ti nagsasaruno a kinaranggas a nakairamanan dagiti menor de edad.
Inpetteng ni Lacson a nasken a matalantan manen dagiti probision ti linteg mainaig iti panagsungbat iti criminal liability no sadinno a nasken a saan nga otomatiko nga agbalin a rason ti tawen tapno makaliklik iti panagsungbat ti naglabsing.
Dinakamat ti Senador ti napasamak idi Pebrero 1993 no sadinno a kinidnap, pinarigatan ken pinapatay ti dua nga agtawen ti 10 nga ubbing a lallaki ti agtawen ti dua nga ubing a ni James Patrick Bulger idiay England.
Daytoy a kaso ket nakaala ti atension iti intero a lubong tapno manglukat ti panangtalantan no kasano nga arisiten ti sistema ti hustisia ti panagsungbat, kinatalged ti publiko ken rehabilitasion dagiti ubbing a nagsalungasing.
Inpaganetget ni Lacson a ti napasamak a pammaltog ti dua a menor de edad iti maysa a pagadalan idiay Tacloban City a nakatayan ti uppat nga agad-adal a nangiduron iti Senador tapno irekomendar manen ti nasao a linteg.
